Bókadeilin hevði tíðindafund á Sankta Frans skúla tann 26.mai. Lærarar og næmingar á skúlanum høvdu saman við Bókadeildini skipað fyri degnum fyri at heiðra Elina á 90 ára føðingardegnum.

Í sambandi við at Elin gjørdist 90 ár tann 26. mai, gjørdi Bókadeildin av at heiðra hana við at geva bók hennara Barn undir krígnum út aftur í nýggjari útgávu.

Bókin kom út á fyrsta sinni fyri tjúgu árum síðani og fekk Barnabókavirðisløn Tórshavnar Býráðs. Hon hevur leingi verið útseld.
Krígstíðin er týdningarmikil partur av søgu okkara, og nú 70 ár eru liðin, síðan bretar komu higar at verja land okkara, hildu vit, at hetta var júst rætta bókin at geva út.
Bókin lýsir tíðina, tá ið bretar hersettu Føroyar í 2. veraldarbardaga, og serliga hvussu børn upplivdu hesa tíðina.
Innihaldsliga er bókin hin sama, men fleiri aðrar myndir eru við umframt tær upprunaligu, sum kunnu lýsa hetta tíðarskeiðið við gleði og sorg.
Bókin er 124 bls. og innbundin.